«Як і бесьпілётная авіяцыя, гэтая галіна адносна маладая для вайскова-прамысловага комплексу, стваралі мы яе літаральна з нуля. Чагосьці дасягнулі, нешта ў нас не атрымалася і не атрымліваецца. Як і ў іншых сэктарах эканомікі, мы дзейнічаем максымальна эфэктыўна, зыходзячы з фінансавых рэсурсаў, якія маем», — працытавала Аляксандра Лукашэнку дзяржаўнае агенцтва БелТА.
Пры гэтым Лукашэнка асобна зьвярнуў увагу на тое, што вызначыцца з разьвіцьцём ракетабудаўніцтва важна менавіта цяпер.
«Гэта важна яшчэ і ў сувязі з маім візытам у Кітайскую Народную Рэспубліку і размовай з старшынём КНР Сі Цзіньпінам, у нас такая сустрэча плянуецца. Чаму? Таму што пачыналі мы або працягвалі ракетабудаўніцтва ў цеснай сувязі з кітайскім вайскова-прамысловым комплексам, і цяпер маем кантакты», — сказаў Лукашэнка.
У 2016 годзе ў Беларусі стварылі ракетную сыстэму залпавага агню «Палянэз» і разам з кітайскімі спэцыялістамі распрацавалі для яе ракеты A200 і A300, якія дасягалі цэляў за 200 кілямэтраў. Пазьней беларускія адмыслоўцы мадэрнізавалі іх і павялічылі далёкасьць дзеяньня да 300 кілямэтраў.
У 2024 годзе Аляксандар Лукашэнка заяўляў, што ў Беларусі цяпер самастойна вырабляюць як самыя комплексы «Палянэз», так і боепрыпасы для іх.
Форум