Іран і Беларусь дамовіліся аб скасаваньні візавых патрабаваньняў для турыстаў у рамках намаганьняў паглыбіць эканамічныя і палітычныя адносіны, піша PressTV.ir.
Міністар турызму Ірану Рэза Салехі Аміры паведаміў, што пагадненьня аб скасаваньні візаў зь Беларусьсю канчаткова дасягнулі ў час перамоваў, якія адбыліся раней у той жа дзень у Менску паміж прэзыдэнтам Ірану Масудам Пэзэшкіянам і Аляксандрам Лукашэнкам.
Салехі Аміры адзначыў, што бакі таксама дамовіліся адкрыць простыя авіярэйсы паміж Тэгеранам і Менскам для павелічэньня турыстычных паездак. Паводле яго слоў, праграма бязьвізавых паездак і новыя авіярэйсы значна ўмацуюць культурныя і турыстычныя сувязі паміж Іранам і Беларусьсю.
Паводле зьвестак агенцтва IRNA, авіяцыйныя ўлады Ірану і Беларусі дамовіліся аб запуску трох прамых рэйсаў у тыдзень паміж дзьвюма краінамі.
Гэтыя дамоўленасьці сталі часткай 12 мэмарандумаў аб узаемаразуменьні (MoU), падпісаных паміж Іранам і Беларусьсю пасьля сустрэчы Пэзэшкіяна і Лукашэнкі 20 жніўня. Сярод іх таксама ёсьць пагадненьне па лётнай прыдатнасьці паміж Нацыянальнай авіяцыйнай адміністрацыяй Рэспублікі Беларусь і Упраўленьнем цывільнай авіяцыі Ісламскай Рэспублікі Іран.
Форум