Адукацыйная пляцоўка Беларуская школа ў Варшаве (БШВ) прапанавала навучаньне дзецям з розных краін сьвету і запрасіла далучыцца да онлайн- і офлайн-заняткаў у новым, 2025/26-м навучальным годзе.
Беларуская школа ў Варшаве (БШВ) існуе зь верасьня 2022 году. Офлайн-заняткі вялі ў філіялах школы (Беласток, Варшава, Гданьск, Кракаў). У онлайн-рэжыме вялі заняткі з жыхарамі больш чым 30 краін сьвету (Вялікай Брытаніі, Беларусі, Грузіі, ЗША, Ірану, Італіі, Кіпру, Расеі, Турэччыны, Украіны, Японіі і інш.).
У школе ладзяць дадатковыя да стандартнай адукацыі краіны жыхарства заняткі ў прадметах беларускага кампанэнту: беларуская мова і літаратура, гісторыя, мастацтва Беларусі й іншыя. Заняткі доўжацца да пяці гадзін у тыдзень офлайн, да трох — онлайн.
У суботніх адзьдзелах БШВ могуць праводзіць дадатковыя офлайн-кансультацыі ў іншых прадметах, мастацкія гурткі. Адміністрацыя школы піша, што вывучаючы прадметы, якіх няма ў плянах замежных школаў, дзеці атрымліваюць духоўную сувязь з Радзімай, маюць беларускае асяродзьдзе, а пры спрыяльных умовах змогуць бяз стратаў часу працягнуць навучаньне ў вольнай Беларусі.
Каб аформіць заяўку на новы навучальны год, трэба запоўніць анкету.
ГЛЯДЗІЦЕ ТАКСАМА: «Алесі і Рагнеды, Кастусікі і Ўршулькі». Беларуская школа ў Варшаве назьбірала 500 вучняў з 28 краін сьвету